ДУШАНБЕ, 6 май - Sputnik. Кумакпулиҳо ба маҷруҳонро зимни аёдат Раҷаббой Аҳмадзода, раиси вилояти Суғд дар беморхонаи Исфара супорид.
Тибқи иттилои котиботи раиси Суғд, Аҳмадзода зимни аёдати ҷароҳатдидагон иброз дошт, ки давлату Ҳукумат барои табобати пурраи онҳо шароити заруриро фароҳам меоварад.
“Баҳри барқарорсозии саломатии сокинон мутахассисони варзидаи соҳаи тиб аз маркази вилоят ва шаҳри Исфара ҷалб гардида, беморон бо дорувории зарурӣ ва хӯроки гарм пурра таъмин мебошанд”, - таъкид кардааст манбаъ.
Раиси Суғд афзудааст, ки роҳбарияти мамлакат барои пурра шифо ёфтани захмиён аз тамоми имкониятҳо истифода хоҳад намуд.
Дар маҷмуъ, барои 87 нафар сокиноне, ки дар натиҷаи даргириҳо захмҳои гуногун гирифта буданд, ба миқдори аз 10 то 20 ҳазор сомонӣ кӯмакпулиҳо расонида шуд. Қаблан хонаводаи 19 қурбонии муноқишаи марзӣ дар Тоҷикистон кумакпулӣ дар ҳаҷми 70 ҳазор сомониро дастрас карда буданд.
Вазъ дар марзи Тоҷикистону Қирғизистон 28 апрел дар пайи як баҳс сари дарғоти “Головной” шиддат гирифта, 29 апрел ба даргирии мусаллаҳона миёни низомиёни ду кишвар печид. Бар асоси иттилои расида, теъдоди қурбониён аз ҳар ду тараф 55 нафарро ташкил медиҳад. Қирғизистон аз ҳалокати 36 шаҳрвандаш дар ин даргирӣ хабар дод.
Тибқи иттилои Кумитаи давлатии амнияти миллии Тоҷикистон, гунаҳкорони қазия шаҳрвандони Қирғизистон будаанд, ки ба сӯи тоҷиконе, ки мехостанд дар он ҷой камераҳои назоратӣ насб кунанд, санг андохтанд ва ҳатто дар ин муноқиша низомиён дар либоси мулкӣ истифода шуданд.
Бишкек, дар навбати худ гуфт, ки шаҳрвандони Тоҷикистон муноқишаро ба роҳ монданд, ба сӯи ҳамсояҳояшон аз силоҳ оташ кушоданд.
Феълан вазъ дар марз муътадил арзёбӣ гардида, 2 май ҳайатҳои Тоҷикистон ва Қирғизистон протоколи муштарак дар бораи делимитатсия ва демаркатсияи сарҳадро ба имзо расонданд.
Тоҷикистону Қирғизистон ҳудуди 970 километр марзи муштарак доранд, ки аз ин то ҳол ҳудуди 520 километраш аломатгузорӣ шуда, боқимонда ҳанӯз ҳам номуаяйян мебошад.