ДУШАНБЕ, 27 апрел - Sputnik. Имрӯз раисҷумҳуруи Тоҷикистон Эмомалӣ Раҳмон дар як қатор ниҳодҳои давлатӣ тағйироти кадрӣ анҷом дод.
Чунончи, тибқи панҷ фармони президент як қатор кадрҳо таъин ва барканор шудаанд.
Ҳамин тавр, тибқи фармони рақами 165 аз 27 апрел Холиқзода Абдураҳим Ғафор директори муассисаи давлатии "Маркази исломшиносӣ дар назди Президенти Ҷумҳурии Тоҷикистон" таъин карда шуд.
Тибқи фармони дигари президент, аз ин мансаб Давлатзода Муродулло Исмат барканор гардид.
Тибқи фармони дигар, Имомӣ Содиқ Ашурбойзода бо сабаби ба кори дигар гузаштан аз вазифаи Сафири Фавқулодда ва Мухтори Ҷумҳурии Тоҷикистон дар Ҷумҳурии Ӯзбекистон ва ҳамзамон Сафири Фавқулодда ва Мухтори Ҷумҳурии Тоҷикистон дар Давлати Исроил озод карда шуд.
Тағйирот дар кадрҳои намояндаи Тоҷикистон дар СММ
Тибқи ду фармони дигар, Маҳмадаминов Маҳмадамин Бозичаевич бо сабаби ба кори дигар гузаштан аз вазифаи Намояндаи доимии Ҷумҳурии Тоҷикистон дар назди Созмони Милали Муттаҳид озод карда шуд ва Ҳикмат Ҷонибек Исмоил ба ҷои вай таъин гардид.