ДУШАНБЕ, 11 апр - Sputnik. Котиботи раисиҷумҳури Тоҷикистон аз анҷоми сафари кории Эмомалӣ Раҳмон дар шаҳру навоҳии вилояти Суғд хабар дод.
Сафари кории Эмомалӣ Раҳмон ба вилояти Суғд аз 7 то 11 апрели соли 2021 ҷараён дошта, ӯ аз шаҳру ноҳияҳои Хуҷанд, Истаравшан, Исфара, Бӯстон, Гулистон ва Бобоҷон Ғафурови вилояти Суғд дидан намуд. Раисиҷумҳур ба фаъолияти як қатор иншооти маъмурӣ, истеҳсолӣ, иҷтимоӣ, кору хизматрасонӣ ва фарҳангӣ, ки ба ифтихори истиқболи сазовор аз ҷашни бузурги миллӣ – 30-солагии Истиқлоли давлатӣ бунёд гардидаанд, ифтитоҳ кард.
Аз ҷумла Эмомалӣ Раҳмон аз ҷамоати Ворух дидан карда, баъди хомӯшиҳо дар мавриди пешниҳоди ҷониби Қирғизистон дар бораи иваз намудани Ворух, мавқеи Тоҷикистонро баён дошт. Ба гуфтаи раисиҷумҳур иваз шудани Ворух ҳеч гоҳ мавриди гуфтушунид бо Қирғизистон набуд ва будан ҳам наметавонад.
Дар ин сафар Эмомалӣ Раҳмон, инчунин ба роҳбарони мақомоти иҷроияи ҳокимияти давлатии вилояти Суғд барои дастгирии соҳибкорон дастур дода таъкид намуд, ки масъалаи ташкил ва нигоҳдории ҷойҳои корӣ омили муҳимми ҳалли мушкилоти иқтисодиву иҷтимоии аҳолӣ ва паст кардани шиддати муҳоҷирати меҳнатӣ мебошад.