ДУШАНБЕ, 25 мар — Sputnik. Дар шаҳри Челябински Русия чор шаҳрванди Тоҷикистон барои гардиши ҳероин ҳукми зиндон гирифтанд. Дар ин бора дафтари матбуоти вилояти Челябинск хабар медиҳад.
Дар рафти тафтишот муайян карда шуд, ки зодагони Тоҷикистон ба ҷинояти гардиши нашъа давоми ду сол машғул буданд.
Тафтишот муайян кардааст, ки маҳкумшудагон маводи мухаддирро тариқи қароргоҳҳои пинҳонӣ ба фурӯш мебароварданд.
Дар рафти боздошт аз онҳо 250 бастаи маводи нашъаовар, ки вазни умумиашон 850 граммро ташкил медод, мусодира карда шуд.
Онро аз манзилҳои истиқоматии боздоштшудагон ва қароргоҳҳои пинҳонии онҳо пайдо намуданд.
Маҳкумшудагон пурра ба ҷурми худ иқрор шуданд. Додгоҳ ба онҳо аз 10 то 13 сол ҳукми зиндони низомаш сангинро таъин кард.
Пештар хабар дода шуд, ки дар рафти амалиёти махсус дар вилояти Саратов як ҷавони 28-солаи тоҷик низ барои гардиши маводи мухаддир равонаи зиндон гашта буд.