ДУШАНБЕ, 19 мар - Sputnik. Дар маҳаллаи Зарафшони пойтахт аз терминали пулгузароние 300 сомонӣ дуздида шуда, ҳамзамон ин дастгоҳ комилан корношоям гардидааст, хабар медиҳад котиботи Вазорати умури дохилаи Тоҷикистон.
Манбаъ меафзояд, бо гумони содир намудани ин ҷиноят сокини 29 - солаи деҳоти 1 - уми Майи шаҳри Турсунзода боздошт гардидааст.
Номбурда аснои бозпурсӣ иқрор шудааст, ки дар содир намудани ин ҷиноят ба ӯ "Комрон" ном дӯсташ кӯмак расонидааст.
ВУД Тоҷикистон мегӯяд, боздоштшуда шаби 12 ба 13 март, тахминан соати 23:20 дақиқа бо роҳи пинҳонӣ дар истгоҳи назди бозорчаи "Зарафшон" терминали маблағгузориро шикастааст.
Сипас аз дохили терминал 300 сомонӣ гирифта, аз ҷойи ҳодиса фирор намудааст. Зикр мегардад, ки зарари расонидашуда 6 777 сомониро ташкил медиҳад.
Феълан, тафтишоти ин ҳодиса идома дорад ва кормандони пулис "Комрон" - ро, ки дар ин ҳодиса низ даст доштааст, ҷустуҷӯ мекунанд.