ДУШАНБЕ, 18 мар – Sputnik. Муовини аввали вазири корҳои хориҷии Давлати Кувайт Маҷдӣ аз-Зафирӣ бо сафири Тоҷикистон дар Кувайт Зубайдулло Зубайдзодаро дидору мулоқот кард.
Дар ин бора Вазорати корҳои хориҷии Тоҷикистон хабар медиҳад.
Гуфта мешавад, ки дар суҳбат ҷонибҳо ҳолат ва дурнамои муносибатҳои дуҷониба, роҳҳои густариш ва таҳкими ҳамкориҳо дар соҳаҳои гуногунро баррасӣ карданд.
Тибқи иттилои ин ниҳод дар ин суҳбат, аз ҷумла масъалаи кушодани Сафорати Давлати Кувайт дар Душанбе ва дигар масъалаҳои мавриди эҳтимоми муштаракро баррасӣ намуданд.
Манбаъ афзуда, ки бо ишора ба муносиботи неку ҳасанаи ду кишвар, тарафҳо бар зарурати табодули сафарҳои сатҳи оливу баланд ва кашфи роҳҳои ҷадид барои густариш ва таҳкими бештари ҳамкориҳо дар соҳаҳои мухталиф таъкид кардаанд.