ДУШАНБЕ, 16 март - Sputnik. Манижа Сангин дар сафҳаи Instagram-аш аз нашри пурраи намоҳанги суруди Russian Woman хабар дод.
Зодаи Тоҷикистон навиштааст, ки намоҳанги таронае, ки Русияро дар Евровидение - 2021 муаррифӣ хоҳад кард, рӯзи 19 март дар ҳама платформаҳои рақамӣ нашр хоҳад шуд.
Манижа дар шарҳ ба ҳамаи онҳое, ки дар ташаккули симои нави ӯ даст доранд ва ӯро монанд ба Маликаи Сувон аз афсонаҳои Русия кардаанд, ташаккур гуфт.
Ёдовар мешавем, ки суруди Russian Woman, ки дар интихоби миллии Евровидение-2021 ғолиб омадааст, рӯзи 8 март дар эфири Шабакаи аввал муаррифӣ шуд.
Пас аз нашри суруд, тамошобинон ба ду гурӯҳ тақсим шуданд: баъзе мунаққидон ва корбарони шабака ба Манижа ҳамла карданд, баъзеи дигар аз тасвири ҷасуронаи ӯ шод гаштаву зодаи Тоҷикистонро дифоъ карданд.
Сарфи назар аз мавҷи вокунишҳои манфӣ, ки сарояндаро фаро гирифтааст, Манижаро бисёр ҳунармандони маъруфи шоу-бизнеси Русия, аз ҷумла Дима Билан, Юлия Савичева, ҳунарпеша Чулпан Хаматова, рӯзноманигор ва сиёсатмадор Оксана Пушкина ва бисёр шахсиятҳои дигар дастгирӣ мекунанд.
Баръакси ҳама вокунишҳои манфӣ ба тамошобинони Евровидение суруди Манижа писанд омад: дар канали озмуни мусиқӣ аллакай 3,5 миллион тамошобин, 137 ҳазор лайк ва ҳазорҳо шарҳҳои мусбат пайдо кардааст.