ДУШАНБЕ, 11 мар — Sputnik. Суруди Манижаи Сангин барои Евровидение - 2021 таҳти унвони "Russian Woman" (Зани рус), ки дар шабакаи расмии озмун дар Youtube нашр шудааст, марзи як миллион бинандаро убур кард.
Бояд гуфт, ки барои ба чунин дастовард ноил шудан ба суруд ҳамагӣ 27 соат басанда буд. Намоҳанг соати 12:00 - и 10 март дар ин саҳифа ҷой дода шуда буд.
Намоҳанги суруди "Russian Woman" - ро беш аз 52 ҳазор корбар писандида ва 24 ҳазор кас написандидааст.
Зери суруди сарояндаи тоҷики муқими Русия аллакай 25 ҳазор шарҳ аз тамоми гӯшаю канори дунё ҷамъ шудааст.
Аксари тамошобинон Манижаро бо гурӯҳи Little Big, ки соли 2020 ба Евровидение пешбарӣ шуда буд, муқоиса мекунанд ва қайд менамоянд, ки зодаи Тоҷикистон дорои стили худӣ мебошад.
Ҳамин тавр, Манижа миёни ширкаткунандагони озмуни Евровидения, сеюмин сарояндаест, ки беш аз миллион бинанда гирифтааст.