ДУШАНБЕ, 5 мар— Sputnik. Чархболи ҳарбӣ дар қисмати шарқии Туркия дучори садама шуд, хабар медиҳад РИА Новости бо истинод ба Вазорати мудофиаи он кишвар.
Ба иттилои манбаъ, чархбол аз Бингеля самти Татван ҳаракат дошт ва ба ногоҳ алоқа бо халабонони он канда шуд. Зимнан, ба ҷустуҷӯи чархбол ҳавопаймои CN - 235 сафарбар шуд, ки макони ба садама дучор шудани чархболро зуд дарёфт.
Маълум гардид, ки бар асари садама 9 низомӣ дар ҷойи ҳодиса ба ҳалокат расида, 4 нафари дигар ҷароҳатҳои вазнини ҷисмонӣ бардоштанд. Аммо баъдан сафи қурбониёни ин ҳодисаи нохуш ба 11 нафар расид.
Гуфта мешавад, миёни қурбониён генерал Усмон Эрбаш низ қарор доштааст.
Дар робита ба суқути чархбол, кишвардори Туркия Раҷаб Тайиб Эрдуғон супориш додааст, ки иллати дучори садама шудани чархбол муайян шавад. Ба маълумоти пешакӣ, сабаби суқут якбора бад шудани вазъи ҳаво мебошад.
Дақиқан сабаби суқути чархбол пас аз анҷоми тафтиши пурра эълон хоҳад шуд.