ДУШАНБЕ, 2 фев – Sputnik. Додситони кулли Тоҷикистон аз қочоқбарон Назаров.С. ва Сафаров.Ф. ном бурдааст, ки дар Фурудгоҳи байналмилалии Душанбе дастгир гардидаанд.
“Аз онҳо 89 килою 350 гр тилло, 489 638 риёл ва 200 000 фунт стерлинг, ки бо роҳи қочоқ ба шаҳри Дубайи Аморати Муттаҳидаи Араб интиқол дода мешуд, ёфта, мусодира гардид”, - изҳор дошт Юсуф Раҳмон зимни ҳисоботи ахираш ба Маҷлиси миллӣ, таҳти раёсати Рустами Эмомалӣ.
Юсуф Раҳмон афзуд, ки маблағи умумӣ зиёда аз 10 миллион долларро ташкил медиҳад. Боздошти гуруҳ 15 ноябри соли 2020 сурат гирифтааст, аммо расман тоза дастраси омма гардид.
Қаблан бархе аз манобеи Sputnik Тоҷикистон гуфтанд, дар Душанбе пули нақду тиллое мусодира шудааст, ки аз Афғонистон ба Тоҷикистон қочоқ шуда буд.
“Ин пулу тило аз тариқи марзҳо ба Тоҷикистон қочоқ шуда, гуруҳи қочоқбар мехост, онро тариқи Душанбе ба шаҳри Дубайи Аморати муттаҳидаи араб интиқол диҳад. Аммо дар фурудгоҳи шаҳри Душанбе ин гуруҳ боздошт ва пулу тилои онҳо мусодира шудааст”, - гуфта буд як манбаъ.