ДУШАНБЕ, 4 дек — Sputnik. Симо Содот Лорӣ, сухангӯи Вазорати тандурустии Эрон мегӯяд, дар 24 соати гузашта дар ҷумҳурӣ 13 ҳазору 341 бемори ҷадиди коронавирус шиносоӣ шуд.
Бахши тоҷикии радиои Садои Хуросон аз қавли Лорӣ хабар дод, ки аз гирифторони ошкоршуда 1 ҳазору 996 нафар бистарӣ шуда, ба бақияи беморон низ хадамоти мавриди ниёзашон расонида шуд. .
"Муттаассифона, дар 24 соати гузашта 347 бемори Ковид - 19 низ ҷони худро аз даст доданд ва маҷмӯи ҷонбохтагони ин беморӣ дар кишвар ба 49 ҳазору 695 нафар расид", - илова намудаст сухангӯи Вазорати беҳдошти Эрон.
Манбаъ афзуд, маҷмӯи беморони коронавирус дар Эрон ба 1 миллиону 16 ҳазору 835 нафар расидааст, ки то кунун 708 ҳазору 106 нафар аз онон беҳбуд ёфтаву аз бемористонҳо мурраххас шудаанд.
Теъдоди афроди олуда ба вируси корона дар ҷаҳон низ ба беш аз 65 миллион нафар расидааст, ки аз ин теъдод як миллиону 513 ҳазор нафар ҷони худро аз даст додаву беш аз 45 миллион нафар ҳам беҳбуд ёфтаанд.