ДУШАНБЕ, 6 авг — Sputnik. Шумораи ҷонбохтагони таркиш дар пойтахти Лубнон – шаҳри Бейрут ба 135 нафар расид, хабар медиҳад "Al Jazeera.
Ба иттилои манбаъ, дар ин таркиш ҳадди аққал 135 кас ҷон бохта, тахминан 5 ҳазор нафари дигар захмӣ шудаанд.
Мақомоти расмӣ иброз доштааст, ки эҳтимоли зиёд гардидани шумораи ҷонбохтагон вуҷуд дорад, чунки наҷотдиҳандагон ҷустуҷӯйи одамони зиндамонадаро дар зери биноҳои валангор идома медиҳанд.
Таркиши шадид дар Бейрут: даҳҳо нафар ҳалоку маҷрӯҳ шуда, биноҳои зиёд хароб гаштанд-навор
Губернатори Бейрут Марван Аббуд гуфт, ки дар шаҳр то 300,000 нафар бесарпаноҳ мондаанд. Мақомот барои бо ғизо, об ва манзил таъмин намудани онҳо кӯшиш мекунад.
Таркиш дар бандари Бейрут шоми 4 август рух дод. Мақомоти маҳаллӣ сабаби ин ҳодисаро таркиши 2,7 ҳазор тонна нитрати аммиак, ки дар анбори бандар нигоҳдорӣ мешуд, арзёбӣ намуданд.
Ин маводро соли 2015 хадамоти гумрук мусодира намуда, онро дар бандари мазкур нигоҳдорӣ мекардааст. Дар Бейрут барои ду ҳафта вазъияти фавқулода эълон шудааст.