ДУШАНБЕ, 26 июл — Sputnik. Ахиран зимни нишасти матбуотӣ мақомоти шаҳри Душанбе элон кард, ки аз моҳи январ то марти соли равон ҳаҷми умумии сармоягузорӣ ба иқтисоди пойтахти кишвар 54,9 млн долларро ташкил додааст.
Мақомоти шаҳр таъкид доштааст, ки имрӯз дар ҳудуди пойтахт 29 корхонаву ташкилот, ки бо сармоягузории хориҷӣ фаъолият мекунанд, ба қайд гирифта шудааст.
Дар ҳамин ҳол, аз ин шумор 16 корхона аз ҳисоби сармоягузории мустақим ба маблағи 25,6 млн доллар ва 13 корхона аз ҳисоби дигар сарчашмаҳои сармоягузорӣ ба маблағи 29,3 млн доллар кор мекунанд.
Ҳамзамон мақомоти пойтахт гуфтааст, ки айни замон дар Душанбе 11 лоиҳаи давлатӣ мавриди татбиқ қарор дошта, аз оғози амалисозии онҳо 434 млн доллар ва дар давраи ҳисоботӣ - 15,6 млн доллар маблағҳо азхуд шудааст.
Давоми шаш моҳи соли равон ҳаҷми савдои хориҷӣ дар пойтахт 216,7 млн долларро ташкил дод, ки дар муқоиса бо ҳамин давраи соли гузашта 9 дарсад зиёдтар мебошад.