ДУШАНБЕ, 29 фев — Sputnik. Синаноглу, ки бо розигии Ҳукумати Тоҷикистон ҳамоҳангсози доимии СММ таъйин шудааст, дар бахши рушд таҷрибаи 25-сола, аз ҷумла собиқаи 22-солаи кор дар Барномаи рушди СММ-ро дорад.
Аз июли соли 2015 то охири соли 2018 Синаноглу ҳамоҳангсози доимии СММ дар Босния ва Герсеговина буда, аз ин пештар ба ҳайси намоянда ва ҳамоҳангсози доимии СММ дар Муғулистон фаъолият доштааст.
Ӯ хатмкардаи донишгоҳи техникии Анқара дар бахши тарҳрезии шаҳр буда, ҳамчунин дар мақомҳои роҳбарии Барномаи рушди СММ дар Ироқ, Туркманистон, Қирғизистон ва дар Барномаи довталабон дар Бонн фаъолият доштааст. Ӯ қабл аз пайвастан ба СММ, ҳамчун шаҳрсоз дар ҳукумати Туркия ва дар бахши хусусӣ дар ИМА кор кардааст.
То ҳол Пратибха Меҳта, намояндаи доимии Барномаи рушди СММ ҳамзамон вазифаи ҳамоҳангсози доимии СММ-ро дар Тоҷикистон иҷро мекард. Ба далели ислоҳоти сохторӣ аз 2 марти соли 2020 хонум Меҳта танҳо намояндаи доимии СММ дар Тоҷикистон хоҳад буд.
Ба иттилои котиботи намояндагии СММ дар Тоҷикистон, вазифаҳои намояндаи доимӣ аз ҳамоҳангсози доимии СММ ҷудо карда шудаанд ва хонум Меҳта тасмим гирифтааст, минбаъд фаъолияташро ба ҳайси намояндаи доимии СММ дар Тоҷикистон давом диҳад.