Дар Маскав ба хотири ҷамъоварии маблағ ба кӯдакони бемор, консерти хайриявии рэпсароёни Бадахшон баргузор гардид.
Дар консерт Амир Мамадамбаров, Сино Зоолшоев, Ҷони ва Неки ҳунарнамоӣ карданд.
Усмон Муйбалихонов шоири ҷавон ровии барномаи ҳунарӣ буд.
"Сипос аз ҳар яки шумо, ки имрӯз бо мо ҳастед. Ҳамроҳ мо қодирем ба бародарони беморамон кумак кунем", - гуфт Усмон дар оғози барнома.
Ба гуфти баргузоркунандгони консерт ин шом беш аз 350 тамошобин ҷамъ шуд ва аз консерт беш аз 170 ҳазор рубли русӣ рӯёнида шуд.
"Ин консерти нахустини хайриявии мо нест. Ман 15-16 бор хайрия ҳунарнамоӣ кардаам. Мақсади имрӯзаи мо кумак ба бародаронамон аст",- гуфт Амир Мамадамбаров дар суҳбат бо Sputnik Тоҷикистон.
Бештари таомшобинонро наврасон ва ҷавонони тоҷики муқими Маскав ташкил медоданд. Ҳамаи онҳо сурудҳои Амирро азбар медонистанд ва дар баробари ӯ зам - зама мекарданду дасту по меҷунбониданд.
Амир мамадамбаров сурудҳои нав ва кӯҳнаи дӯстдоштании худро пешкаши мухлисонаш кард.
Амир сурудҳои "Тарка" (Ба куҷо), "Мне мало тебя" (Ту бароям камӣ), "My Pamir" (Помир ман), "Лап хах зарум уз" (Ман бисёр дурам) ва ғайраро сароид.
Ин барномаи ҳунарӣ ба хотири кӯмак ба ду кӯдаки бемор - Амир ва Зоир, ки якумӣ бемории саратон дораду тоза ҷарроҳӣ шудааст ва дуюмӣ аз бемории гурда азият мекашад, баргузор карда шуд.
Рэпсароён дар давоми ду соат бо овози зинда назди мухлисон ҳунарнамоӣ карданд.