ДУШАНБЕ, 30 дек — Sputnik. Сокини 47-солаи шаҳри Истаравшани вилояти Суғд ҳамсари 35-солаи худро бо зарби 13 корд зада ба қатл расонидааст, иттилоъ додааст дафтари матбуоти Вазорати корҳои дохилаи Тоҷикистон.
Бино бар иттилои манбаъ, рӯзи 27-уми декабри соли равон, марди 47-солаи сокини шаҳри Истаравшан, ки пеш бо моддаи 177 Кодекси ҷиноятии Тоҷикистон маҳкум шуда буд, бо ҳамсараш зани 35-солаи сокини ноҳияи Мастчоҳ, аз сабаби рашк муноқиша намудааст.
“Сипас номбурда бо мақсади аз ҳаёт маҳрум намудани ҳамсараш, бо корди хоҷагӣ 13-маротиба ба узвҳои бадани ӯ задааст”, - таъкид доштааст ВКД.
Дар ҳамин ҳол, дар натиҷа, зани 35-сола ҷароҳатҳои гуногуни ҷисмонӣ бардошта, дар беморхона ба ҳалокат расидааст.
Дар ҳоли ҳозир кормандони милитсияи Тоҷикистон, нисбати номбурда парвандаи ҷиноятӣ бо моддаи 104 қисми 1 Кодекси ҷиноятии Ҷумҳурии Тоҷикистон оғоз намудаанд.
Тавре манбаъ қайд намудааст, дар ҳоли ҳозир, аз сӯи кормандони милитсия тафтишоти ҳодиса идома дорад.