ДУШАНБЕ, 22 авг — Sputnik. Тибқи иттилои Вазорати мудофиаи Русия генерал Герасимов бо мақсади иштирок дар ҷаласаи Кумитаи сардорони ситоди нерӯҳои мусаллаҳи кишварҳои узви ИДМ, ки 23 август дар Душанбе дар назар аст, озими ин шаҳр шуд.
Ҳайатҳои ситодҳои нерӯҳои мусаллаҳи Озарбойҷон, Арманистон, Белорус, Қазоқистон, Қирғизистон, Русия ва Узбакистону Тоҷикистон дар ин ҳамоиш иштирок хоҳанд кард.
Гуфта мешавад, сардорони ситоди нерӯҳои мусаллаҳи кишварҳои ҳамсуд дар ҷараёни ҷаласа масъалаи дурнамои ҳамкориҳои муштарак ва рушди ҳамкориҳои гуногунҷабҳа, инчунин ташкили низомҳои муштараки низомӣ мавриди баҳсу баррас ӣ қарор медиҳанд.
Зимнан, қайд гардид, ки зимни сафари корӣ сардорони ситодҳои нерӯҳои мусаллаҳи кишварҳои ИДМ аз "Кохи Наврӯз", "Боғи Ирам" ва Осорхонаи миллӣ боздид мекунанд.
Вазорати дифои Русия мегӯяд, зимни ин нишаст ҳамчунин иштирокдорон вазъи сиёсӣ-низомии марзҳои ҷанубии ИДМ-ро баррасӣ мекунанд. Инчунин таҳдидҳою чолишҳо барои амнияти кишварҳои узви Иттиҳоди давлатҳои мустақил таҳлилу баррасӣ мешаванд.