ДУШАНБЕ, 9 авг — Sputnik. Тибқи иттилои дафтари матбуоти раиси вилояти Суғд, қарори Аҳмадзода дар бораи тасдиқи нақшаи чорабиниҳо барои беҳтар намудани фазои сармоягузорӣ дар соҳаи кишоварзӣ ва рушди тиҷорати аграрӣ рӯзи 8 август ба имзо расид.
Манбаъ афзуд, ки нақшаи мазкур чорабиниҳои пешбинишуда барои солҳои 2019-2021 дар вилояти Суғдро дар бар мегирад.
“Нақшаи чорабиниҳо аз 19 банд иборат буда, ниҳодҳои дахлдор ва мақомоти иҷроияи ҳокимияти давлатии шаҳру ноҳияҳо барои иҷрои чорабиниҳо вазифадор карда шудаанд”, - омадааст дар иттилоия.
Котиботи раиси вилояти Суғд таъкид намуд, ки нақшаи тасдиқшуда то соли 2021 ба беҳтар намудани фазои сармоягузорӣ дар соҳаи кишоварзӣ ва рушди тиҷорати аграрӣ равона гардида, барои ҷалби сармояи дохиливу хориҷӣ, дар истеҳсолот ҷорӣ намудани технологияҳои муосир, рушди корҳои селексионӣ, бештар намудани содироти маҳсулот ба хориҷи кишвар тадбирҳои заруриро фаро мегирад.