ДУШАНБЕ, 28 июн — Sputnik. Имрӯз, 28 июн сафари расмии Президенти Ҷумҳурии Тоҷикистон Эмомалӣ Раҳмон дар Ҷумҳурии Беларус оғоз ёфт ва бо раисҷумҳури Беларус дар “Қасри истиқлолият” вохӯрданд, оттилоъ додааст дафтари матбуотии раисҷумҳури Тоҷикистон.
Маросими истиқболи расмӣ Эмомалӣ Раҳмон дар “Қасри истиқлолият”-и Беларус баргузор шуд.
Ба хотири пазироии самимӣ “Қасри истиқлолият” бо парчамҳои давлатии ду кишвар идона оро дода шуд.
Горди фахрии президентӣ, оркести асбобҳои нафасӣ ва ҳайатҳои расмии ҳар ду ҷониб саф оростанд.
Эмомалӣ Раҳмонро Президенти Ҷумҳурии Беларус Александр Лукашенко гарму самимӣ истиқбол гирифта, ба болои шоҳсуфаи фахрӣ даъват кард.
Маросими истиқболи расмии Президенти Ҷумҳурии Тоҷикистон бо садо додани сурудҳои миллии ду кишвар, гузашти Сарвари давлати Тоҷикистон аз назди қатори сарбозон, арзи эҳтиром ба Парчами давлати мизбон сурат гирифта, бо шиносоӣ бо ҳайатҳои расмӣ ва гузашти горди фахрӣ аз назди сарони кишварҳо ба анҷом расид.