ДУШАНБЕ, 17 май — Sputnik. Имрӯз дар шаҳри Душанбе маросими имзои Протоколи мубодилаи тасдиқномаи Шартнома оид ба шарикии стратегӣ байни Ҷумҳурии Тоҷикистон ва Ҷумҳурии Узбакистон баргузор гардид, иттилоъ додааст агентии "Ховар".
Манбаъ афзудааст, ки санади мазкурро аз ҷониби Тоҷикистон Вазири корҳои хориҷӣ Сироҷиддин Муҳриддин ва аз ҷониби Узбакистон Вазири корҳои хориҷӣ Абдулазиз Комилов имзо намуданд.
Мавриди зикр аст, ки Шартнома оид ба шарикии стратегӣ байни Тоҷикистон ва Узбакистон 17 августи соли 2018 дар шаҳри Тошканд зимни сафари давлатии Президенти Тоҷикистон Эмомалӣ Раҳмон ба Узбакистон аз тарафи роҳбарони ду давлати ҳамсоя ба имзо расида буд.
Мутобиқи моддаи 16-и Шартномаи мазкур ин санад аз 17 майи соли 2019 эътибор пайдо кард.