ДУШАНБЕ, 29 апр — Sputnik. Автобусе, ки дар дохилаш мактаббачагон будаанд, дар ҳудуди вилояти Тошканд чаппа шуда, оташ гирифтааст, иттилоъ додааст дафтари матбуотии Вазорати ҳолатҳои фавқулодаи Узбакистон.
Манбаъ афзудааст, ки 7 нафар ҷароҳатҳои ҷисмонӣ бардоштаанд.
Дар иттилоия омадааст, ки 29 апрел соати 02:00 дар роҳи маҳалии ноҳияи Уртичирчики вилояти Тошканд автобуси Mercedes, ки аз сӯи Бухоро ҳаракат доштааст, чархаш кафида, чаппа шуда, тоб хӯрдааст.
Дар натиҷа автобус оташ гирифта сӯхтааст. Дар дохили автобус 53 нафар, аз ҷумла 37 талабаи мактабҳои таҳсилоти миёна қарор доштаанд.
“Ҳама мусофирон ба таври фаврӣ ба ҷои бехавф кучонида шудаанд ва касе ҳалок нашудааст. Ҷароҳатбардоштагон дар ҷои ҳодиса бо ёрии аввалин таъмин шудаанд”, - омадааст дар иттилоия.
Ба маълумоти манбаъ дар натиҷаи садама 7 нафар, ки ҳамааш калонсолон будаанд ҷароҳатҳои ҷисмонии гуногун бардоштаанд. Ду нафари онҳо дар бемористони маҳалии ин ноҳия ва 5 мусофири дигар дар беморхонаи ҷумҳуриявии Маркази ёрии таъҷилии шаҳри Тошканд ҷой дода шудаанд.