Тибқи қарори ҳукумати Тоҷикистон, дар маҷмӯъ маблағи 14 миллиону 261 ҳазору 751 сомонӣ (наздик ба 1,5 миллион доллар) андози напардохтаи соҳибкорону ширкатҳо ва ҳамчунон ҷаримаву фоизҳои он аз сӯи давлат бахшида мешавад.
Тибқи тартиби авфи андозҳо, кумита ҳақ дорад қарзи андозеро, ки то 300 ҳазор сомонӣ аст, мустақилона бубахшад. Аммо агар қарзи андоз аз 300 ҳазор сомонӣ бештар бошад, танҳо бар асоси пешниҳоди Вазорати молия ҳукумати Тоҷикистон онро беэътибор эътироф кунад. Худи кумита чунин салоҳият надорад.
Коршинос Короленко таъкид намудааст, ки чунин чораҳои ҳукумат барои бедор намудан ва суръат бахшидани иқтисоди кишвар лозим аст.
“Инҷо суоли муҳим дар онаст, ки чунин иқдом мустақим аст ё машварати баъзе аз ширкатҳои давлатӣ. Давлат дар сурати бахшидани қарзҳои корхонаҳо, метавонад қарзи давлатиашро афзоиш диҳад. Барои ҳукумат беҳтар аст, ки худаш қарз бигирад, на инки ширкати давлатӣ. Ҳоло аксари иқтисодҳои ҷаҳон аз ҳисоби қарзи давлатӣ дастгирӣ мешаванд. Чунин иқдомро Амрико, Аврупо ва Чин низ ба кор мебаранд. Дар ин кишварҳо қарзи давлатӣ нисбат ба ММД-и кишвар зудтар афзоиш меёбад”, гуфт коршинос ба Sputnik Тоҷикистон.