ДУШАНБЕ, 17 фев — Sputnik. Ахиран дар Филармонияи давлатии бачагонаи Тоҷикистон ҷаласа доир ба пешгирии шомилшавии ҷавонон ба ташкилотҳои экстремистию терористӣ баргузор гардид, иттилоъ додааст дафтари матбуоти вазорати фарҳанг.
Саранҷом намояндаи кумитаи амнияти миллӣ дар бораи пешгирии шомилшавии ҷавонон ба ташкилотҳои экстремистию терористӣ суханронӣ намуда, иброз дошт, ки бинобар беаҳамиятию камсаводии баъзе аз афроди мамлакат имрўзҳо баъзе аз ҷавонон ба гумроҳӣ рафта, аз надонистани оқибатҳои шомил шудан ба гурўҳҳои ифротӣ даст ба ҷиноятҳои хатарнок мезананд.
Вай таъкид намуд, ки зиёда аз 150 нафар ҷавонон берун аз сарҳад дар ҳудуди Афғонистон ва дигар кишварҳои ҳамсоя оворагард шудаанд.
“Аз ҳар як корманд эҳтиромона хоҳиш карда мешавад, ки зиракию ҳушёрии сиёсиро аз даст надода, дар ҳолати пай бурдани шахсони шубҳанок, ки амалҳояшон ба гурўҳҳои ифротӣ алоқамандӣ дорад, ҳатман ба нозири минтақавӣ ва ё ба телефонҳои боварии мақомотҳои қудратӣ занг зананд” - иброз дошт намояндаи Кумитаи давлатии амнияти миллии Тоҷикистон.
Дар фарҷом директори Филармонияи давлатии бачагонаи Тоҷикистон Салоҳиддин Раззоқов таклиф ба миён овард, ки дар муассиса ҳафтае як маротиба дар ҷаласаҳои назоратӣ мавзӯи пешгирии шомилшавии ҷавонон ба ташкилотҳои экстремистию терористӣ баррасӣ гардад.