ДУШАНБЕ, 31 дек — Sputnik. Аввалин парвози чартерии ширкати ҳавоии “Сомон Эйр” дар хатсайри Душанбе-Шарм-ул-шайхи анҷом ёфт, иттилоъ додааст дафтарии матбуоти ширкати "Сомон Эйр".
Бино бар иттилои манбаъ, парвози мазкур бори нахуст дар таърихи авиатсияи граждании тоҷик мебошад.
Ширкати сайёҳии “Компас” фармоишгари хатсайри чартерии Душанбе –Шарм-ул-шайх буда, намояндагии ширкати мазкурро дар Тоҷикистон ширкати “Трансавиа Экспресс” бар уҳда дорад.
Манбаъ таъкид кардааст, ки бори нахуст бо ҳавопаймои Боинг 737-800 168 нафар мусофир аз Душанбе ба самти Шарм-ул-шайх сафар карданд.
Парвозҳо аз Душанбе ба ин самт дар ҳар 10 рӯз як маротиба сурат мегирад, вақти парвоз аз Душанбе то Шарм-ул-шайх 5 соатро ташкил медиҳад.
Мавриди зикр аст, ки алҳол ширкати ҳавопаймоии “Сомон Эйр” парвозҳоро аз Тоҷикистон ба самти Олмон, Амороти Муттаҳидаи Араб, Туркия, Чин, Русия, Қазоқистон ва Узбакистон анҷом медиҳад.
Ширкати ҳавопаймоии “Сомон Эйр” дорои ҳавопаймоҳои Боинг 737-300, 737-800 ва 737-900 мебошад.