ДУШАНБЕ, 10 окт — Sputnik. Саршумории озмоишӣ дар пойтахти Тоҷикистон ва шаҳри Нораки вилояти Хатлон рӯзи 10 октябри соли равон оғоз мегардад, иттилоъ додааст хабаргузории ТоҷикТА.
“Аз 10 то 24 октябри соли равон бо мақсади татбиқи лоиҳаи барномаи саршумории аҳолӣ ва маскан дар соли 2020, дар минтақаи 64-ум ва 91-уми шаҳри Душанбе саршумории озмоишии аҳолӣ ва маскан, баргузор хоҳад шуд”, - гуфтааст манбаъ.
Инчунин, дар ин давра барӯйхатгирии озмошӣ дар шаҳри Норак низ оғоз мегардад.
Саршумории умумии аҳолӣ ва маскан дар соли 2020 баргузор хоҳад шуд. Қарор аст, ба раванди барӯйхатгирии ҷумҳуриявӣ беш аз 35 ҳазор коргар ҷалб карда шавад.
Дар ҳоли ҳозир аҳолии Тоҷикистон ба беш аз 9,1 миллион нафар расидааст.