ДУШАНБЕ, 27 сен - Sputnik. Тибқи иттилои дафтари матбуоти раисиҷумҳури Тоҷикистон, боғи мазкур, ки дар майдони қариб 3 гектар доман густурда, бо дастури Эмомалӣ Раҳмон бо саҳми КВД “Роҳи оҳани Тоҷикистон” тайи як сол бунёд гардид.
Масъулин ба раисиҷумҳури Тоҷикистон иттилоъ додаанд, ки тибқи лоиҳа, дар Боғи ба номи Аҳмади Дониш зиёда аз 11 ҳазору 500 метри мураббаъ роҳравҳо сафолакпӯш ва 12 ҳазор метри муррабаъ майсазор гардонида шудаанд.
“Барои чароғонкунии боғ 225 адад сутунпояи аз 4 то 9-метра ва шумораи зиёди дигар дастгоҳу таҷҳизоти муосири равшанидиҳанда насб карда шудаанд, ки ҳудуди ин иншооти фарҳангӣ-фароғатиро шабонгоҳ хеле ҷолибу назаррабо менамоянд”, - омадааст дар иттилоия.
Манбаъ афзуд, ки бо дастури раисиҷумҳур дар боғи мазкур наздики 1000 бех дарахтони нодири сояафкану ороишӣ, ки бештари онро аз хориҷи кишвар овардаанд, шинонида шудаанд.
Дафтари матбуоти раисиҷумҳури Тоҷикистон мегӯяд, боғи навбунёд бо пешниҳоди Эмомалӣ Раҳмон номи Аҳмади Дониш гузошта шуд.