ДУШАНБЕ, 6 сен — Sputnik. Тибқи гузориши аксӣ, Эмомалӣ Раҳмон дар синфхонаи таълими меҳнати мактаби навбунёд тарзи дурусти чӯбтароширо нишон дода, сипас дуредгарии наврасро назора кардааст.
Дафтари матбуоти раисиҷумҳури Тоҷикистон мегӯяд, синфхонаҳои таълими меҳнати мактаби навбунёд барои омӯзиши ҳунарҳои дуредгарӣ, кандакорӣ, дӯзандагӣ ва ғайра шароити мусоид доранд.
Манбаъ афзуд, ки мактаби мазкур аз ҷониби Баҳриддин Ҷурахонов, роҳбари корхонаи "Моҳир семент" бо харҷи 17 миллион сомонӣ сохта шуда, барои 1500 ҷойи нишаст дар ду баст пешбинӣ шудааст.
Бинои мактаб аз се ошёна иборат буда, дар майдони 1,23 гектар бунёд гардида, дорои 30 синфхонаи фаннӣ, озмоишгоҳҳо, толори варзишӣ, маҷлисгоҳ, ошхона, хонаи муаллимон ва дигар ҳуҷраҳо ҷойгир шудаанд.
Масъулин ба раисиҷумҳури Тоҷикистон иттилоъ додаанд, ки дар мактаби мазкур таълиму тадрис бо ду забон- тоҷикӣ ва русӣ сурат гирифта, барои баланд бардоштани савияи дониши хонандагон ва забономӯзии онҳо аз Русия омӯзгорон ҷалб гардидаанд.