ДУШАНБЕ, 16 июл — Sputnik. Замир Кобулов, фиристодаи раисиҷумҳури Русия оид ба масоили Афғонистон, мегӯяд, эътимод ба гуруҳи тундрави Толибон дар бархе аз манотиқи Афғонистон беш аз боварӣ ба ҳукумат аст.
Кобулов дар суҳбат бо “Коммерсант” изҳор доштааст, ки “Толибон” беш аз ними қаламрави Афғонистонро таҳти назорат гирифтааст ва аҳолии маҳаллӣ ба онҳо беш аз ҳукумат боварӣ доранд.
Ба гуфтаи фиристодаи Путин ҳукумати Афғонистон сари ҳамоиш бо Толибон барои ба эътидол овардани вазъ дар кишвар андеша дорад.
“Амалан Толибон дар ҳаёти ҳарбӣ-сиёсии Афғонистон вориданд ва аз нисф зиёди қаламрави кишварро таҳти назорат доранд. Ба сохтори давлати параллелие, ки Толибон сохтаанд, аҳолӣ беш аз мақомоти расмӣ эътимод дорад ”, - афзудааст дипломат.
Ӯ таъкид намудааст, ҳатто дар минтақаҳое, ки мақомоти расмӣ ҳузур доранд, аксаран Толибон нерӯи калидӣ мебошанд.
Нашри суҳбати фиристодаи Путин дар ҳолест, ки ахиран Майк Помпео, вазири умури хориҷии ИМА зимни боздидаш аз Кобул гуфт, “стратегияи мо дар Афғонистон, паём ба Толибон аст. Интизор набошанд, ки мо аз Афғонистон меравем”.
Ӯ аз муваффақияти стратегияи кишвараш дар Афғонистон иттилоъ дода, изҳор доштааст, ки аъзои гуруҳи тундрави "Толибон" дар майдони ҷанг аллакай заиф шудаанд ва майли табдилёбӣ ба ҳаракати сулҳхоҳ доранд.