ДУШАНБЕ, 17 мар — Sputnik. Парлумони Тоҷикистон тавофуқномаи рафтуомади бераводид бо Узбакистонро баррасӣ кард, хабар медиҳад дафтари матбуотии Маҷлиси намояндагони ҶТ.
Бино бар иттилои манбаъ, Созишномаи номбурда аз дебоча ва 17 модда иборат буда, бо мақсади густариши минбаъдаи муносибатҳо миёни ду давлат ва инкишофи тамосҳо байни шаҳрвандони Тоҷикистон ва Узбакистон, инчунин баҳри танзими ҳуқуқии тартиби мусофирати мутақобилаи бераводиди шаҳрвандони ин кишварҳо байни Ҳукумати Тоҷикистон ва Ҳукумати Узбакистон ба имзо расидааст.
Дар моддаҳои 1-4 Созишномаи мазкур муҳлат барои ба таври транзит убур кардан ва иқомати муваққатан дар ҳудуди давлатҳои тарафҳо, инчунин бо ҳуҷҷатҳои дахлдор бидуни раводид ворид гаштани шаҳрвандон ба ҳудуди давлати Тарафи дигар ва тартиби бемонеа ва бераводид ба ҳудуди давлати он Тараф барои иҷро намудани вазифаҳои хизматӣ ворид, аз он хориҷ шудан ва дар он иқомат намудани шаҳрвандоне, ки хизматрасонии объектҳои давлати як Тарафи дар ҳудуди давлати Тарафи дигар қарор доштаро анҷом медиҳанд, инъикос гардидааст.
Мувофиқи моддаҳои 5-9 тартиби додани раводидҳои бисёркарата ба муҳлати то 12 моҳ барои ронандагони воситаҳои наклиётие, ки боркашонии автомобилии байналмилалиро анҷом медиҳанд, ҳамдигарро хабардор намудани Тарафҳо оид ба масъалаҳои мансуб ба соҳаи татбиқи муқаррароти Созишномаи мазкур, аз ҷумла, муқаррароти замимаҳои №№№ 1, 2, 3 ва озод будани шахсони дахлдор аз супоридани хироҷи консулӣ барои раводид муайян гардидааст.
Моддаҳои 10-12 ҳуқуқи шаҳрвандони Тарафҳоро барои ворид, хориҷ шудан ва тариқи транзитӣ убур намудан тавассути нуқтаҳои гузаргоҳии барои убури сарҳади давлати муайяншуда тибқи қонунгузории миллии давлатҳои Тарафҳо муқаррар намуда, ҳамзамон риояи қонуну қоидаҳои давлати Тарафи иқоматро ҳангоми буду бош дар ҳудуди он ва дар ҳолатҳои истисноӣ (хатар ба амнияти миллӣ, тартиботи ҷамъиятӣ ё ба саломатии шаҳрвандон, аз ҷумла, ҳолатҳои фавқулода ва ғайра) ҳуқуқи муваққатан ё қисман боз доштани амали Созишномаи мазкурро аз ҷониби Тарафҳо ба танзим даровардааст.
Ҳалли масъалаҳое, ки ҳангоми татбиқи ҳамин Созишнома ба вуҷуд меоянд, дахолат накардан ба ҳуқуқ ва уҳдадории Тарафҳо, ки аз дигар шартномаҳои байналмилалӣ сарчашма мегиранд, аз ҷумла, истифодаи забони расмӣ, ворид намудани тағйиру иловаҳо ба ҳамин Созишнома ва муҳлати эътибор пайдо намудан ва тартиби қатъи амали онро моддаҳои 13, 14, 15, 16 ва 17 инъикос намудааст.
Кумитаҳои Маҷлиси намояндагон ва шуъбаи ҳуқуқи Дастгоҳи Маҷлиси намояндагони Маҷлиси Олии Ҷумҳурии Тоҷикистон Созишномаи номбурдаро мавриди баррасӣ қарор дода, бо пешниҳоди хулосаҳо онро ҷонибдорӣ намуданд.
Аъзои Шӯро ҳамчунин "Дар бораи даъват намудани ҷаласаи навбатии иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон даъвати панҷум рӯзи 19 марти соли 2018" ва лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон "Дар бораи рўзномаи ҷаласаи навбатии иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон", даъвати панҷум қарорҳои дахлдор қабул намуданд.
Ёдрас мешавем, пештар раисҷумҳури Узбакистон Шавкат Мирзиёев қарореро ба имзо расонид, ки мувофиқи то ба тавсиб расидани ин тавофуқнома аз ҷониби маҷлиси Узбакистон, ба шаҳрвандони Тоҷикистон аз 16 март иҷоза дода мешавад, ки бидуни раводид вориди Узбакистон шаванд.