ДУШАНБЕ, 25 янв — Sputnik. Ашраф Ғанӣ, президенти собиқи Афғонистон дучори сактаи мағзӣ гардидааст, хабар медиҳад рӯзномаи "Kabul Times".
"Муҳаммад Ашраф Ғанӣ кишвардори собиқи Афғонистон сактаи мағзӣ шуд", - навиштааст ин рӯзнома.
Зимнан BBC низ бо истинод ба як манбаи боэътимодаш дар Абузабӣ хабари бемор шудани Ашраф Ғаниро таъйид кардааст. Ин хабаргузорӣ навишт, ки ӯ 25 январ дар манзили худ дучори сактаи мағзӣ шудааст.
Гуфта мешавад, Ғаниро пас аз ба ин дард гирифтор шудан фавран ба бемористони Шайх Зоҳид интиқол додаанд ва ӯ феълан таҳти табобати пизишкон қарор дорад.
То нашр шудани ин хабар ҷузъиёти бештари вазъи сиҳҳати Ашраф Ғанӣ маълум нашуда буд. Наздикон ва ашхоси наздик ба Ашраф Ғанӣ ҳоло расман бемор шудани ӯро таъйид накардаанд.
Ғанӣ 15 август дар ҳоле ки толибон дар канораҳои Кобул қарор доштанд, аз Афғонистон фирор кард. Ӯ далели тарки кишвар карданашро ҷилавгирӣ аз хунрезӣ дар Кобул хондааст, аммо бисёре аз сиёсатмадорону шаҳрвандони Афғонистон ин амалашро хиёнат ба халқу Ватан унвон карданд.
Дар рӯзҳои аввал аз фирори Ғанӣ ба Тоҷикистон, Ӯзбекистон ва Уммон гузориш мешуд, аммо расман ин иттилоъ такзиб гардид.
Генерал Муҳаммад Зоҳири Ағбар, сафири Афғонистон дар Тоҷикистон таъкид кард, ки Ашраф Ғанӣ, раисҷумҳури пешини Афғонистон дастовардҳои 20-солаи кишварро зери по гузошту кишварро номардона тарк кардааст. Ӯ афзуд, Ғанӣ бо худ ҳудуди 169 миллион доллари нақди мардуми Афғонистонро низ бурдааст.